MANDADOS DO MECO: LUNS

 O alumnado de ESO cumpriu co primeiro mandado do Meco e apandou con algo na cabeza.

DÍA INTERNACIONAL DA LINGUA MATERNA

 O Día Internacional da Lingua Materna foi proclamado pola Conferencia Xeral da UNESCO en novembro de 1999 e celébrase anualmente dende o 21 de febreiro de 2002 cos obxectivos de promover o plurilingüismo e a diversidade cultural. 

A lingua materna é aquela en que os nenos e as nenas aprenden a falar e a relacionarse co seu contorno máis próximo. A UNESCO quere impulsar o coñecemento e a práctica das linguas maternas de menos falantes tamén na escola, nos medios de comunicación, na internet... fóra dos ámbitos en que moitas delas quedan recluídas. O Día Internacional da Lingua Materna estableceuse para sensibilizar acerca da importancia dos idiomas e da función vital que desempeñan no desenvolvemento, ao garantir a diversidade e o diálogo intercultural, así como o fortalecemento da cooperación e a consecución da educación de calidade para todos, a construción de sociedades do coñecemento integradoras e a preservación do patrimonio cultural.

A UNESCO lémbranos que «os idiomas, coa súa complexa imbricación coa identidade, a comunicación, a integración social, a educación e o desenvolvemento, son factores de importancia estratéxica para as persoas e para todo o planeta. Con todo, a causa dos procesos de globalización, pesa sobre as linguas unha ameaza cada vez maior de extinguirse (...). Coa extinción dos idiomas mingua tamén a rica urda da diversidade cultural. Pérdense posibilidades, tradicións, lembranzas, modalidades únicas de pensamento e de expresión; recursos valiosos e necesarios para lograr un futuro mellor. (...) Afortunadamente, e grazas a que se asumiu a importancia que teñen estas linguas, alcanzáronse logros en materia de educación plurilingüe baseada na lingua materna, en particular na educación primaria. Así mesmo, hai un compromiso cada vez maior para que se desenvolvan na vida pública. As sociedades multilingües e multiculturais existen a través das súas linguas, que transmiten e preservan os coñecementos e as culturas tradicionais de maneira sostible. Por iso, debemos coidar de todas as linguas”.

https://www.lingua.gal/

DÍA INTERNACIONAL DA MULLER E A NENA NA CIENCIA: 11 DE FEBREIRO

En 2016 a Asemblea Xeral das Nacións Unidas proclamou o 11 de febreiro como o Día Internacional da Muller e a Nena na Ciencia coa finalidade de lograr o acceso e a participación plena e equitativa na ciencia para as mulleres e as nenas, e ademais acadar a igualdade de xénero e o empoderamento das mulleres e as nenas.
Malia que, nos últimos anos, a comunidade internacional promoveu a participación das mulleres e das nenas na ciencia, estas seguen atopando obstáculos para desenvolverse no campo da ciencia.
Recomendamos ler a seguinte publicación do Portal da Palabras:

MULLERES SABIAS DA TERRA

DÍA ESCOLAR DA PAZ E A NON VIOLENCIA

 

As alumnas e os alumnos de ESO, coas súas mensaxes a prol da paz, axudaron a crear este mural para conmemorar o Día Escolar da Paz e a non Violencia.

DÍA DE ROSALÍA DE CASTRO: 23 DE FEBREIRO

O Día de Rosalía de Castro pasará a celebrarse o 23 de febreiro, auténtica data de nacemento da poeta. 

A Fundación Rosalía de Castro convocou hoxe unha xuntanza entre representantes de entidades culturais e de distintas administracións para mudar a data de celebración do día da poetisa galega ao 23 de febreiro. Este cambio prodúcese despois de que a investigadora galega Sagrario Abelleira revelase o pasado ano nova documentación que acredita a data de nacemento real nese día, dando a coñecer ademais datos inéditos sobre a vida de Rosalía e da do seu home, Manuel Murguía.

https://www.lingua.gal/

CALENDARIO CIENTÍFICO ESCOLAR

Xa se pode descargar o Calendario Científico Escolar en lingua galega, que todos os anos realiza o Consello Superior de Investigacións Científicas, a Unidade de Divulgación Científica e Cultural e o Servizo de Normalización Lingüística da Universidade da Coruña.

Pódese descargar neste enlace: https://digital.csic.es/handle/10261/256425

LEXISLACIÓN LINGÜÍSTICA

EDUCACIÓN SECUNDARIA OBRIGATORIA

 

                                                          EDUCACIÓN PRIMARIA

FACEBOOK DO EDLG

 O Equipo de Dinamización da Lingua Galega do CPIP Cabo da Area xa ten conta de Facebook.

2022: ANO DE FLORENCIO DELGADO GURRIARÁN

Florencio Manuel Delgado Gurriarán naceu en Córgomo de Valdeorras o día 27 de agosto de 1903. Era o menor de cinco irmáns. Viviu en Córgomo ata os seis anos en que marcha a Ourense e ós dez a Palencia. Nesta última cidade estudou o bacharelato e a carreira de Dereito en Valladolid.

No ano 1928 volveu vivir a Córgomo, comezando a traballar como pasante no bufete do avogado Segudo Trincado. Da personalidade de Florencio, do seu compromiso coa súa terra, fala o feito de que se integrase plenamente cando regresou á súa aldea, e iso que levaba case toda a vida fóra. É un aspecto que salienta Ricardo Gurriarán no seu libro Florencio Delgado Gurriarán (Ediciós do Castro, Sada, 1999). Florencio participaba en tódalas actividades que se organizaban na aldea (de moitas delas era el o organizador). Gustáballe a música e posuía unha voz que destacaba en tódalas festas e esmorgas que facían os mozos de Córgomo, e iso que este lugar sempre gozou dunha merecida fama de bos cantantes.

O compromiso e apego á súa terra levouno a vincularse ás Irmandades da Fala, ó Partido Galeguista e ó Partido Nacionalista Republicano de Ourense. Coa Guerra Civil tivo que exiliarse en México en 1939, tras pasar antes por Portugal e Francia.

En México dirixe as revistas "Saudade" e "Vieiros"(1959).

Volveu a Galicia en 1968, 1976 e en 1981(para ser pregoeiro das festas do Cristo, tomar posesión como Membro de Mérito do IEV). Estas visitas nunca foron definitivas xa que sempre terminaba regresando a México.

O día 14 de maio de 1987, cando tiña 84 anos, morría en California. As súas cinzas foron trasladadas ó seu Córgomo natal.

http://www.edu.xunta.gal/portal/node/35457

PALABRA DO ANO 2021: TANXUGUEIRAS

A palabra tanxugueiras acaba de converterse na Palabra do Ano 2021, tras se facer coa maioría dos votos das persoas que participaron na elección promovida polo Portal das Palabras, web para a difusión do léxico galego da Real Academia Galega e a Fundación Barrié.

Esta palabra gañou popularidade nos últimos meses da man da banda de Olaia Maneiro, Aida Tarrío e Sabela Maneiro, un referente dos novos camiños que está a abrir, con grande éxito, a música tradicional galega.

Tanxugueiras é, en realidade, o plural dun microtopónimo, que elevado á Palabra do Ano se converte tamén nunha icona da gran riqueza da lingua galega como produtora de nomes de lugar que conforman un patrimonio inmaterial único no mundo.

O topónimo Tanxugueira popularizado pola banda musical designa unhas terras da parroquia de Fumaces, no concello de Riós (Ourense), situadas nun alto e abeiradas

O vocábulo é unha alteración da forma etimolóxica Teixugueira, un zootopónimo común no país que sinala os sitios onde hai presenza ou abundancia de teixugos ou porco teixos, un tipo de mamífero de vida nocturna que se alimenta de bichocas, landras e plantas coma a do millo, polo que nalgúns lugares de Galicia se tocaba o corno polas noites para espantalo. Esta voz popular remite probablemente ao latín taxo, taxonis, o nome latino que recibía o ‘teixugo’, aínda que podería vir tamén dunha suposta forma xermánica *thahsus ou do gótico *thahsuks.

https://portaldaspalabras.gal/tanxugueiras-palabra-do-ano-2021/